На главную   ::   Новости   ::   Фотогалерея   ::   Написать нам   
 



Google





Суретшілер Еркінбек және Алмагүл Есімовтердің «Қылқалам ұшындағы кие» атты жеке көрмесінің ашылу кеші

20.01.2011
Бүгін ҚР Ұлттық академиялық кітапханасының көрме галереясында Суретшілер Одағының мүшелері, суретшілер Еркінбек және Алмагүл Есімовтердің «Қылқалам ұшындағы кие» атты жеке көрмесінің ашылуы өтті.Б

ҚР Ұлттық академиялық кітапханасы осы көрмемен өзінің жаңа жылдық көрме галериясының жұмысын бастады. Галерия қайта жандана түсті. Қабырғаларға ілінген Еркінбек және Алмагүл Есімовтердің суреттері сан қилы сыр шертіп, көркемдік әлемге қол бұлғай шақырады. Көрмеге олардың 48 жұмысы қойылды.

Суретшілердің жұмыстары әр түрлі бағытта. Еркінбек абстракцияға, авангардизм мен сюреализмге қалам тербейді. Е.Есімов болашаққа сеніммен қарап, әр түрлі бағытта дүниетанымын дамытуда үнемі ізденісте жүреді. «Ол өте сенімді және батыл мінезді. Бұл оның суреттерінен де байқалып тұрады», - дейді суретшінің жұбайы Алмагүл. Көрмеге Еркінбектің «Дала Сұлтаны», «Рахат», «Әке мен бала», «Сплетение», «Странник», т.б. жұмыстары қойылды. Еркінбектің соңғы жұмыстарында біздің қоғамдағы отбасылық қарым-қатынас, соның ішінде әке мен бала, жақсылық пен жамандық, жас ұрпақты өнегелі тәрбиелеу мәселелері көрсетілген. «Дала Сұлтаны» суретінде суретші өзінің көп әйел алушылық мәселесінің шешіміне көзқарасын, ал «Сплетение»жұмысында отбасын сақтау мен қорғау, жұбайлар жұбының жазылмай, әрқашан бірге болуын көксеген ойларын өрнектеген. «Әке мен бала» жұмысында әкелердің балаларын тағдыр тәлкегіне салмай, әке мен бала бірлігін сақтау мәселесін бейнелейді. «Құрбылар» суреті достыққа арнау болып табылады.

Алмагүлдің соңғы жұмыстары «В пути», «Встреча», «Доброе утро», «Небожители», «Ожидание», «Плывущие по волнам», т.б. Оларда суретші жүйеленген графикалық сызықтар арқылы еркіндіктің, қозғалыстың яғни, өмірдің нышандары - құстың, балықтың бейнелері салынған. Ал «Туған жер», «Мгновения вечности», «Көктем», «Көктөбе» суреттері этносимволдық стильге жатады. Олар түрлі-түсті, ашық түстермен салынып, көмкерілген қазақтың қошқармүйізі пайдаланған. Суретші өз жұмыстарында туған жер табиғатының сұлулығын, өз халқына деген сүйіпеншілігін бейнелеген.

Бейнелеу өнерінен басқа Еркінбек пластика мен керамика, ал Алмагүл гобеленмен айналысады.

Еркінбек пен Алмагүл Есімовтер Алматыда Т.Жүргенов атындағы Театр және өнер институтын бірге тәмамдап, қызығы мен қиыншылығы сан мың бояумен біте қайнасып, буырқанған суретшілік өнерде жұптарын жазбай келе жатыр. Олар республикалық және қалалық көрмелердің қатысушылары.

Бүгінде Есімовтер шығармашылығы Қазақстан Респуликасының Парламентінде, Министрліктер мен елшіліктерінде қойылған, сондай-ақ Ресей, Австрия, Германия, Жапония сияқты шетелдерге де танымал.

Кеште Еркінбек пен Алмагүл Есімовтерді ҚР Ұлттық академиялық кітапханасы бас директорының орынбасары Ғ.Б. Исақанова, Қазақстан суретшілер одағы төрағасының орынбасары М.Т. Тоқсейітов, Астана қаласы Қазіргі өнер мұражайының директоры Н.В. Шиврина мен Суретшілер одағының мүшелері - Т.Б. Байғалиев, Т.Т. Бажакупов құттықтады.